| bandar's profile°•ღ لـحـن مـنـثـور ღ•°PhotosBlogLists |  Tools  Help |
|
|
December 26 °•ღ ابشركم صرت كنعد بالاسهم مو هامور هع هع ღ•°بسم الله الرحمن الرحيم
اعزائي المشاهدين والمشاهدات عبر جميع القارات
تحية طيبة مني لكم انا محدثكم لحن منثور وباخر الليل ابو كراعين
السلام عليكم ورحمة الله وبركاته
بما اني صرت مضارب بسوق الاسهم السعودية المحلية وعجرتي ماتنزل من يدي وصرت اكفخ الشركة الفلانية واعصر مخ العلانية قلت ياولد ليش ماتفيد خلق الله وتخليهم يضاربون مثلك بس طبعا بشروط لازم توقعون على الاتفاقية اللي راح اكتبها الاتفاقية طبعا هذي حرمت نادي الاتفاق هع هع
وانا راح اكتب لكم كل يوم توصية على شركة زوينة ان شاء الله نطلع من وراها مربح طيب وتدعون لي وممنوع احد يدعي علي اتفقنا هع هع
بس اهم شي الموافقة على الشروط واللي يوافق يتحمل مايجيه والنص بالنص ويابخت من وفق راسين بالحلال << وش دخلها
الشرط الاول
ان تكون لديك القدرة على تحمل التكفيخ من قبل المضاربين الاخرين
الشرط الثاني
ان تكون لديك الخبرة الكافية في مجال التكفيخ يعني تكون اكلت لك اقل شي عشر تكفيخات من قبل مضاربين يشار لهم بالبنان
الشرط الثالث
ان تكون علابيك عريضة وقوية وفيها سواد على الجانبين والمنكبين هع هع من اجل تخريع باقي المضاربين واخذ فلوسهم هع هع
الشرط الرابع
ان تكون ذا بنية جسمانية زينه مو يجيني واحد طول ساقي يقول ابي اضارب ويشوه سمعتنا هع هع وطبعا لامانع من مضاربة البنات بس بشروط ايضا
الشرط الاول للبنات
ان يكون لديها اظافر طويلة من اجل التشميخ واذا عندها تشوهات خلقية مايمنع انها تجيب معها قطوة تقوم باللازم حيال ذلك
الشرط الثاني
ان تكون شينة بقوووه علشان مايخطفها احد المضاربين الاخرين ونخيس فيها احنا
الشرط الثالث وهو المهم
ان يكون قلبها متحجر يعني لايوصله لا موية ولا كهرباء علشان مايحن قلبها نبغى ناس تقتل القتيل وتمشي بشسموه ولازم تشرب قدامنا كاس دم يعني نبغاها دموية علشان نتاكد
طبعا تقديم الطلبات راح تبدأ من الليلة وعليكم السرعان قبل نفاد الكمية لان بصراحه الطلبات علي واجد تعرفون واحد مثل عمود الكهرب والعروض عليه زي الرز
واللي مايعرف يكتب يدق علي بيجر ويحط ثلاث تسعات هع هع
ودمتم بود ومضاربات رابحة باذن الله
لحن منثور سبيس تون فرانكفورت لندن
November 01 ~¤ô_ô¤~واخيرا اجزنا مابغينا والله ~¤ô_ô¤~بسم الله الرحمن الرحيم
السلام عليكم ورحمة الله وبركاته
الحمد لله رب العالمين والصلاة والسلام على اشرف الانبياء والمرسلين اما بعد << يحس انه بالاذاعه المدرسية منذ ايام مبطي
حبيت ابشرك واخيرا وبعد ماطلعت ارواحنا بدت الاجازه بتاعتنا وصرنا نغني وجتنا الاجازه وينك يا اقرب طياره هع هع
بصراحه من فرحتي مدري شسوي ودي اول شخص يرد علي اضمووووه وامطق خشموووه الين يصير احمر من سعابيلي هع هع
نعم انه في هذا اليوم المشهود يوم الاثنين ياحبي ليوم الاثنين بحبوه على طول واخليه اقدع يوم بالعالم
الموافق 31/10/2005 المصادف لليوم 28/9/1426
ارتحنا من غثا الدوام وظرافة العملاء الرايقين اللي تقول نشتغل عند ابوهم الله ابوهم هم واشكالهم اللي مدري وش تبي
المهم طبعا الحين راحت السكره وجاء وقت الفكره كل هالايام اللي طافت واحنا ننتظر الاجازه بفارغ الصبر علشان الواحد ينزلع يمين والا يسار يروح يشم شوية هواء او يشرب عصير طازج هنا او هناك هع هع
انا كنت مقرقر بيني وبين نفسي اني اروح لدبي وافل ابوها هناك بس اخوياي باقو فيني ووهقوني لاهم اللي خلوني ادور على اخوياء من بدري ولاهم اللي بيطسون وياخذوني معهم لو على صدام السياره
والمفأجة الساره من دفاشتي دقيت على الماما وباباتي علشان اسلم عليهم وناخذ اخبارهم ولقيت كم خبر شين عندهم انسدت نفسي شوي والشيخ ابو خالد اطال الله بعمره وامده بالصحه والعافيه اللي هو ابوي الله يحييه حياة سعيده قال وراك ياوليدي ماتجي تعيد عندنا ترى العيد من غير خشتك ماتسوى <<< وانا اعفط خشتي واقول والله ودي يابيي بس تخبر الاجازه قصيره ولا بوه حجوزات وصعب اني اجي بالسياره واخبط هالمشوار علشان كم يوم والمشكله ان امي حالفه ما اجي بسياره الا اذا كانت اجازتي طويله << نصاب بس يبي يزحلق السالفه
قال عادي ياوليدي حتى لو تجي بالنقل الجماعي وبقول اخر سابتكو وبقول اصح كرنك هع هع
قلت يابيي انت خابرن عصاقيلي طويله والنقل الجماعي مايوسعني ولا اقدر اخذ راحتي وامد رجيلاتي فيه وحتى اني مريت عليهم يوم مالقيت حجوزات طيران بس قالوا كل شي فل هع هع <<< وربي خاسي عاقب
لكن انا محتار مشتاق لكم وودي اعيد عندكم بس العذر والسموحه منكم ومن الاهل والاقارب وكل الاصحاب وجميع الدروج والدرجات هناك
قال اجل ناوي تعيد بالرياض سكتت شوي واخذت نفس عميق وشهيقتين وزفيرتين قلت ايه وش نسوي مالنا بشوفتكم نصيب
قال الوالد العزيز لايكون حولك خته يالسمرمدي يمين والا يسار رديت بضحكه جميله قلت ياليت بس ماهنالك شي يستاهل بس يمكن نبي نطلع للبر نقعد كم يوم وبقفل جوالي لاتقلقون علي هع هع
قال حشا منت ولدي ضب وين تطلع بهالشموس هع هع قالت يابيي ابشرك رقزنا الله بامطار وخير والربيع يغطي الرجال وهو واقف << كأن مافيها اخبار ولا تلفزيونات هع هع
هههههههههههههههههههاي يلعن ام التصريفه قال هين والله ان حولك مشروع سربته بس شف وين تبي تطس قلت لا يابيي انا ولدك لاتخاف علي
وبعدها كلمت البيت وردت علي اختي الصغيرونه طبعا احب ادلعها ام صطيف هع هع وقمت اتكلم معها لبناني ومره اردني ومره سوري وقالت شكلك منسم والا متزوج مسيار يالسربوت قلت يعنبو حيك الحين انتي وش عرفك للمسيار هع هع
قالت انت اللي كنت تهددنا انك بتتزوج مسيار والا نسيت قلت ايه صح ذكرت بس ماحسبتك يالفنعوصه تعرفين هالسوالف
وطبعا ذكرتن بسالوفه قديمه كنت مره كاتب قصيده ومطلعها شيهانة وراحت علمت البيت كلهم قالت بندر يحب وحده اسمها شيهانه وانك تبي تعرس عليها وهي ماعندها ماعند جدت ابو خالي
المهم قلت انزلعي واعطيني امي قالت امي منجضعه يعني منسدحه وبقول اخر منبطحه يعني كسرت انعاس بعد هالفطور قلت انزلعي انتي وعطيني الماما واكلم الماما وعلومك واخبارك وعساك طيبه وصحتك مثل الحصان وهي ترد بكل اسف وتصدمني وقالت هو انت خليت بها حصن والا حمير الله يكرمكم انت اخذت كل حيلنا بغربتك وتبدأ موال ليه ماتنقل ياوليدي ومدري وشو وانا اصفق عرق من الفشله وانا ارد عليها وقلت ياميه انا كل ماكلمتك تعيدين نفس الموال خلاص لاتخلوني اعرس بدون ما اعلمكم ولا حتى اخليكم تحظرون عرسي هع هع قالت تسويها يالمهوي بس وين البنت اللي تاخذك انت وعصاقيلك بدون اهل قلت عادي اقول لهم اني مقطوع من سقره هع هع قالت سوها وشف وش يجيك
مدري ليه انا طولت عليكم ومدري وش قلت بس هذا كلام كان يقرقع براسي من فرحتي بالاجازه وحبيت ابطحوه لكم والسلام خير ختام << ختام والا حصه هع هع
October 29 °•ღ عـيــد سـعــيـدღ•°بسم الله الرحمن الرحيم
السلام عليكم ورحمة الله وبركاته
بمناسبة حلول عيد الفطر المبارك اعاده الله علينا وعليكم وعلى الامة العربية والاسلامية جمعا يسرني ان افتتح هذه الصفحه من اجل استقبال التهاني بمناسبة العيد واحببت ان اخبركم ان العيديات التي سوف استقبلها بأي حال من الاحوال يجب ان تكون كاااش يعني حتى شيكات ماتمشي معنا اخاف تكون بدون رصيد واتوهق والا يجيني واحد جار خروف مع قرونه وش اسوي فيه انا انسان عملي واحب الكاش
حياكم وكل عام وانتم بخير وعساكم من عواده
October 25 ♠ ♣ شوق روحي ♠ ♣الا يافرحتي يامنيتي ياغذا الروح
ياشوق روحي بالهوى يامناها
ياوردةٍ نبتت على دمعي بسوح
اليوم فارق وابعد الله شذاها
اسقيتها طماع في عطرٍ يفوح
ودم قلبي صار لذة غذاها
على نماها صرت عجلٍ ومشفوح
وزانت بعين الناس وجا من خذاها
يلعب بقلبي حبها وين ماتروح
حسبي على اللي في غيابي نشاها
ماباقي الا شقة الجيب والنوح
وصلت حكاية حبنا منتهاها
ان ماتصافينا على كل مصلوح
والا على الفرقى تسابق خطاها
وان ماتعاهدنا وجدنا بساموح
والا ترى عتمٍ علينا سماها
ماعاد غيره من يغمد لي جروح
ان مارجعت لي حالتي واغباها
ان مارجعت وردتي صرت مذبوح
لعوي كما ذيابٍ تقطع عواها
واشق جيبي وين ماراحت اروح
وروحي لها الله يجبر الله عزاها
▐ ░ ▒▬♦ جرح من عدة جروح ▐ ░ ▒▬♦بسم الله الرحمن الرحيم
السلام عليكم ورحمة الله وبركاته
هذا جرح من عدة جروح اكل عليها الزمن وشرب
اكتب لك كلماتي .. .. وانا بعيد عن مكاني October 13 ｡๑۩۞۩๑ ❤☀ لحن ومغنى ｡๑۩۞۩๑ ❤☀بسم الله الرحمن الرحيم
السلام عليكم ورحمة الله وبركاته
هذي محاولة اخرى لعلها تعجبكم وتنال استحسان ذوقكم الشعري
يافاتنه لو كان قلبك حكالي
وعرفت في ظامرك وش تقولين
لرسل مع النظرات حكي بالي
تفسير للي ماتشوفيه بالعين
واقول انا بالحب مالي مجالي
مشاعري بالحب ماتت من سنين
يابنت لو تدرين بلي جرالي
غصب عليك بعالي الصوت تبكين
لو كنت ماني عندك اليوم غالي
غريب ماتدرين عن ديرتي وين
يامن تميزتي بحسن الجمالي
قلبك عطوف وللمحبة تميلين
لايخدعك راس من الشيب خالي
عشرين عام وكن عمري ثمانين
اجامل الحيين واجلس بحالي
اخشى قلوب قاسيه مابها لين
تلتاع لازان الزمان وصفالي
وتشمت لاعذبني الهم والبين
يافاتنه صدي وشوفي بدالي
لاتبحثين جروح قلب لها حين
واذا شفتي جريح الليالي
تجنبيه وجنبيه كل المزايين
وسلامتكم
October 10 ˚◦ஐ˚◦ + طبق رمضاني ماركت عزوبي + ◦˚ஐ˚◦:بسم الله الرحمن الرحيم
السلام عليكم ورحمة الله وبركاته
طبعا انا جايب لكم اليوم طبق يهبل كود تاكلون هوا من وراه هع هع
بدل ماتاكلون اصابيعكم اللي جعلها للعفط
طيب المقادير طبعا بالبداية علشان مانجيب العيد
نقول نجيب سطل مويه فيه مويه <<< اما من غير مويه كثر منوه هع هع
وطبعا نجيب رقعه وبرواية اخرى خرقه وبرواية اصح قطة قماش ستان هع هع
وباقي علينا نجيب صابون تايد البديل حقوه (( فيري بالترنج)).ا
والحين جاء وقت الشغل بحق وحقيقه
طبعا اول شي نحط التايد بالسطل المعبأ بالمويه ونخلطه خلطا وخفقا جيدا الين يزبد يعني يطلع رغوه هع هع
وبعدين نجيب قطعة القماش ونغمسها بالسطل ونخليها تتغلغل بين الماء والصابون الين يلعن ابو جد جدها ويتغير لونها من اشهب الى رماصي
ونشوف اقرب سياره ونلحسها تلحيس هههههههاي
انتهى الفاصل
بالله يالعزوبية على بالك وراك طبخات او تعبية كرشات هع هع غسيل سيارات ويخب علينا هع هع
طبعا نسيت احط لكم الاكله بعد الانتهاء من تزبيطها هع هع
October 08 °•ღ لـحـن قديم من الحاني ღ•°بسم الله الرحمن الرحيم
اضع امام اعينكم وبين ايديكم لحن قديم من الحاني له اثر كبير في نفسي وخصوصا لانها كانت بداياتي مع الشعر والكتابات اتمنى ان يحوز على اعجابكم
نطقت بكلمة كانت تعاندني على لساني قوتني يوم الوقت والتعبير خان راعيها حقيقه وقفت ضدي وخلتني انا الجاني على ذيك الملاك الى عطتني شوف عينيها تقول ارجوك صارحني اذا لك بالهوى ثاني واذا لك بالهوى قصة دخيلك لاتخفيها قلت اي والله ان الحب ضحكني وبكاني وانا لي بالهوى قصة تبكي عين قاريها وانا عشقت من قبلك بنات اشكال والواني وحبك آخر أمالي وفيك اليوم ببنيها غشاها حيره وغيره وشك ونار وأحزاني وصدت واشهقت واقفت وبل الدمع خديها وفزيت اتبع خطاها واقول الموقف اعماني تكفين اصبري ابشرح لك القصة ومافيها وناظرت لي وقالتلي ابيك اليوم تنساني رح الله يسعدك والبنت تلقى من ينسيها وصحت وطحت مغشين علي من الذي جاني وصاحت يوم شافتني وشالتني بيديها وقالتلي وهي تبكي خلاص ارجوك هذاني أمانه رد قبل أنهي حياتي وأنت تنهيها صحاني عبير أنفاسها والصوت أحياني على آخر روح ردتني عسى ربي ينجيها ومرة سبعة أيام معاها كنت سهراني ليلة جوها عاصف تسليني واسليها ردتني لموضوع البنات وحبي الفاني قلتلها البنات اهن القصايد في معانيها وباستني وطيرها الهوى وبقيت وحداني وأثاريها قصيدة عذبت بالحب راعيها
October 07 خنبقت البدايةبسم الله الرحمن الرحيم
الحمد لله رب العالمين والصلاة والسلام على اشرف الانبياء والمرسلين سيدنا محمد وعلى اله وصحبه اجمعين
اما بعد .......
اقول عطنا المقص خلنا نقص الشريط ونخلص
مع السلامه |
|||||||
|
|
